O certame ofrécelles ás marcas a oportunidade de darse a coñecer dunha maneira orixinal nun evento que xunta cada ano máis de 12.000 persoas e que conta cun público fiel e participativo tamén nas redes, onde rebasa os 25.000 seguidores
Os jalpóns do Festival de Cans buscan padriño. As dez salas nas que se proxectan as curtas da sección oficial e as pezas das seccións paralelas e onde teñen lugar os encontros e presentacións de novos proxectos ofrécense como espazo promocional privilexiado para patrocinadores públicos ou privados que queiran axudar a levar adiante a duodécima edición do Festival, que se celebrará do 20 ao 23 de maio na parroquia de Cans (O Porriño). A Asociación Cultural Arela busca novos apoios e novas vías de financiamento para a organización dun evento que conta cun público é fiel e activo, non só á hora de achegarse cada ano ata o Porriño, senón tamén nas redes sociais, onde congrega xa a máis de 25.000 seguidores en Facebook e 4.700 en Twitter.
Ofrecen visibilidade na próxima edición do festival e na rede, a cambio do que cada marca poida achegar. O festival comprométese a buscar propostas de visibilización orixinais e específicas, á medida de cada marca: dende grandes empresas que queiran patrocinar un dos espazos singulares do certame ata pequenos negocios que desexen facer intercambios en especies -como empresas de automóbiles, alimentación, telefonía ou informática-, poñer un spot nas pantallas das salas antes do visionado das curtas ou un anuncio no Canzine, a revista oficial do certame. Búscanse especificamente empresas relacionadas co sector infantil, xa que este ano se habilitarán espazos para os máis pequenos. Aquelas empresas que estean interesadas en apoiar o festival poden contactar coa organización a través do mail patrocina@festivaldecans.com.
O Festival abriu esta vía de busca de patrocinio privado ante a incerteza das achegas dos organismos públicos e en anos anteriores obtivo unha boa resposta, sobre todo, por parte de pequenas empresas de distintos sectores. Na pasada edición foron máis de 70 as empresas e institucións que colaboraron dun ou doutro xeito co evento. O festival considera que as administracións teñen unha responsabilidade no apoio á creación e a difusión cultural, polo que agardan incrementar as axudas públicas, pero intentan xerar ingresos propios e patrocinios privados para evitar na medida do posible que os retrasos e incertezas das achegas públicas afecten á organización do evento.
Se precisades máis información ou imaxe, non dubidedes en pedilas = Sonia Díaz Pereiro | 679 96 56 92
