Desde a súa creación en 2006, a DAG, Asociación Galega de Deseñadores, leva desenvolvendo de forma ininterrompida unha serie de iniciativas centradas na promoción e difusión do deseño galego en Galicia e no exterior. Entre todas elas, sobrancea o FEED, o foro que organiza bianualmente e que constitúe xa unha referencia e un punto de encontro para todos os deseñadores e interesados na cultura do deseño no país.
De acordo co seu carácter itinerante -Pontevedra e Compostela acolleron as edicións anteriores do foro- o FEED trasládase este ano á Coruña. A edición deste ano celebrarase o 20 e 21 de novembro e estará articulada ao redor de dous eixos principais:
Open design / Deseño de código aberto / Deseño social.
Deseño web / Deseño de interacción / Tipografía web.
Como vén sendo habitual, no programa proposto coinciden en plano de igualdade deseñadores de referencia do estado e europeos con deseñadores do noso país, sempre co ánimo de fomentar así un intercambio fluído e mutuo de experiencias e coñecementos.
No cartel e folleto fornécese información pormenorizada sobre os colaboradores, participantes, así como sobre os contidos e o formato das xornadas. A mesma información, pero máis ampliada, figura tamén na páxina do evento, á que se pode acceder desde este enlace:
dag.gal/gl/feed2015/
